ធនាគារ ហត្ថា
គឺជាធនាគារមួយក្នុងចំណោមធនាគារឈានមុខផ្សេងទៀតនៅកម្ពុជា
បានចុះហត្ថលេខាលើអនុស្សារណៈនៃការយោគយល់គ្នាស្តីពីកិច្ចសម្របសម្រួលជំរុញសកម្មភាពពាណិជ្ជកម្ម
និងការលើកកម្ពស់ការប្រើប្រាស់ផលិតផលខ្មែរ ជាមួយអគ្គនាយកដ្ឋានជំរុញពាណិជ្ជកម្ម
នៃក្រសួងពាណិជ្ជកម្ម និងក្រុមហ៊ុនម៉ាក្រូ (ខេមបូឌា) ឯ.ក
ក្នុងគោលបំណងដើម្បីលើកកម្ពស់ការប្រើប្រាស់ផលិតផលខ្មែរ
និងធ្វើឱ្យវិស័យពាណិជ្ជកម្មរបស់កម្ពុជាមានការអភិវឌ្ឍកាន់តែប្រសើរឡើង។
ពិធីចុះហត្ថលេខានេះ ត្រូវបានប្រារព្ធឡើងនៅ ខេត្តសៀមរាប នារសៀលថ្ងៃទី១៦ ខែមិថុនា
ឆ្នាំ២០២២ ក្រោមអតិបតីភាពដ៏ខ្ពង់ខ្ពស់របស់ ឯកឧត្តម ឈួន ដារា
រដ្ឋលេខាធិការក្រសួងពាណិជ្ជកម្ម។
លោកឧកញ៉ា ហួត អៀងតុង ប្រធានអគ្គនាយក ធនាគារ ហត្ថា បានមានប្រសាសន៍ថា
“ការសហការ
រវាង ធនាគារ ហត្ថា និងអគ្គនាយកដ្ឋានជំរុញពាណិជ្ជកម្ម នៃក្រសួងពាណិជ្ជកម្ម
និងក្រុមហ៊ុនម៉ាក្រូ (ខេមបូឌា) ឯ.ក ក្នុងថ្ងៃនេះគឺ ជាការរួមចំណែកលើកកម្ពស់ការប្រើប្រាស់ផលិតផលខ្មែរយើងឱ្យមានការអភិវឌ្ឍ
និងការរីកចម្រើនកាន់តែខ្លាំងក្លាឡើង តាមរយៈការតាំងចិត្តខ្ពស់របស់ធនាគារ ហត្ថា
ក្នុងការចូលរួមសកម្មភាពជំរុញពាណិជ្ជកម្ម និងព្រឹត្តិការណ៍ពាណិជ្ជកម្មនានា
ដែលនឹងរៀបចំដោយនាយកដ្ឋានជំរុញពាណិជ្ជកម្ម នៃក្រសួងពាណិជ្ជកម្ម
និងក្រុមហ៊ុនម៉ាក្រូ ដែលយើងបានចុះអនុស្សារណៈគយល់គ្នានាវេលានេះ”។ លោកបន្តថា “ក្នុងនាមជាធនាគារពាណិជ្ជ ដែលមានបណ្តាញសាខាធំជាងគេលំដាប់ទី២ក្នុង
ព្រះរាជាណាចក្រកម្ពុជា ធនាគារ ហត្ថា
និងផ្តល់ជូននូវកញ្ចប់សេវាហិរញ្ញវត្ថុពិសេសជាច្រើនប្រភេទប្រកបដោយភាពបត់បែន
ដល់ពាណិជ្ជករ ផលិតករ ឬអាជីវករ ដែលមានបំណងពង្រីកសក្តានុពលនៃពាណិជ្ជកម្ម ផលិតកម្ម
និងអាជីវកម្មរបស់ខ្លួនឱ្យមានការអភិវឌ្ឍ និងរីកចម្រើនក្នុងការផលិតផលិតផលខ្មែរយើងឱ្យកាន់តែមានគុណភាពដល់អ្នកប្រើប្រាស់”។ ជាចុងក្រោយ លោកជឿជាក់ថាការសហការរវាង ធនាគារ ហត្ថា និង
អគ្គនាយកដ្ឋានជំរុញពាណិជ្ជកម្មនៃក្រសួងពាណិជ្ជកម្ម រួមទាំងក្រុមហ៊ុនម៉ាក្រូ
(ខេមបូឌា) ឯ.ក នឹងជួយជំរុញឱ្យមានការអភិវឌ្ឍវិស័យពាណិជ្ជកម្ម
និងការលើកកម្ពស់ការប្រើប្រាស់ផលិតផលខ្មែរ ឱ្យកាន់តែទូលំទូលាយទូទាំងប្រទេស
និងសកលលោក។
.jpg)
